Ministri i Jashtëm iranian, Abbas Araghchi, ka deklaruar se kryeministri izraelit, Benjamin Netanyahu, po përpiqet ta tërheqë Shtetet e Bashkuara në një luftë tjetër me Iranin për të shmangur burgosjen, ndërsa ka paralajmëruar Uashingtonin kundër ndërmarrjes së veprimeve të reja ushtarake.

"Netanyahu po e çon Amerikën drejt një lufte tjetër për të mos përfunduar në burg", shkroi Araghchi në platformën amerikane të mediave sociale X, vonë të dielën, duke shtuar se lideri izraelit nuk po i merr parasysh pasojat për Izraelin dhe për presidentin amerikan, Donald Trump.

"Herën e fundit që deshët ta 'përfundonit punën', Irani doli edhe më i fortë. Doni ta provoni sërish fatin? Urdhëroni. Por kini kujdes; edhe ne kemi punë të papërfunduara", shtoi ai, shkruajnë mediat e huaja, përcjell Telegrafi.

Nën hijen e gjyqit

Netanyahu e ka drejtuar qeverinë aktuale që nga fundi i vitit 2022; një qeveri që cilësohet si më e djathta në historinë e Izraelit.

Kryeministri izraelit po përballet gjithashtu me një proces gjyqësor brenda vendit për akuza korrupsioni – të cilat, në rast dënimi, mund të çojnë në burgosje – ndërsa që nga viti 2024, ai kërkohet edhe nga Gjykata Ndërkombëtare e Drejtësisë për krime lufte në Gaza.

Dhe partitë opozitare kanë intensifikuar bashkërendimin e tyre për ta zëvendësuar qeverinë e Netanyahut përmes zgjedhjeve.

SHBA-ja dhe Izraeli ndërmorën sulme ushtarake kundër Iranit më 28 shkurt, gjë që nxiti sulme hakmarrëse nga ana e Teheranit.

Pavarësisht një armëpushimi në prill dhe një marrëveshjeje kuadër në qershor, luftimet rifilluan më vonë, ndërsa negociatat mes Uashingtonit dhe Teheranit ngecën. /Telegrafi/