Ditëve të fundit është rritur numri i rasteve të reja me COVID-19, në krahasim me rastet ditore në muajin korrik. Për momentin në Maqedoni ka 627 raste aktive me COVID-19.

Megjithatë, autoritetet shëndetësore thonë se vaksinimi, që sipas ekspertëve është shpëtimi kryesor nga pandemia, vijon me temp të mirë në territorin e të gjithë shtetit. Me një dozë janë vaksinuar 31 përqind e popullsisë mbi 18 vjeç, përcjell Telegrafi Maqedoni.

Sipas të dhënave të Ministrisë së Shëndetësisë, më shumë qytetarë me dozën e parë janë vaksinuar në Shkup (159.514), në Manastir (35.067) dhe në Tetovë (31.007).

Kumanova, Prilepi dhe Ohri kanë në mes 20.000 – 25.000 qytetarë të vaksinuar me dozën e parë, ndërsa në mes 15.000 – 20.000 ka në Veles, Kavadar, Strumicë, Gostivar dhe Shtip.

Ndryshe, sipas të dhënave të fundit në Maqedoni janë infektuar gjithsej 156.543 persona, prej të cilëve 150.422 janë shëruar, ndërsa 5.494 kanë ndërruar jetë./Telegrafi/