Zëvendëskryeministri i parë dhe njëherësh kryetar i Lëvizjes Demokratike, Izet Mexhiti, ka deklaruar sot se pavarësisht largimit të Arben Taravarit dhe Aleancës për Shqiptarët nga koalicioni qeveritar, Qeveria mbetet stabile dhe e përkushtuar ndaj interesave të qytetarëve.

Në një prononcim për mediat, Mexhiti theksoi se Koalicioni VLEN dhe Qeveria aktuale janë të angazhuara në përmirësimin e jetës së qytetarëve, duke kritikuar një pjesë të spektrit politik për, siç tha ai, fokusim ndaj interesave të BDI-së dhe liderit të saj, Ali Ahmeti.

“Qeveria është stabile, Qeveria punon për zgjidhjen e problemeve të qytetarëve. Ne brengosemi për qytetarët, që ata ta kenë më mirë, ata të tjerët brengosen dhe dëshirojnë që t’ia lehtësojnë Ahmetit. Mirëpo secili do të përgjigjet para strukturave të veta dhe në zgjedhjet që vijnë, zgjedhjet lokale,” u shpreh Mexhiti.

Ai theksoi se prioritet absolut për VLEN mbeten qytetarët dhe votuesit shqiptarë:
“Për ne prioritet mbi prioritetet janë qytetarët dhe votuesit tanë.”

Deklarata e Mexhitit vjen në një moment të rëndësishëm për skenën politike shqiptare në Maqedoninë e Veriut, pas ndryshimeve në balancat brenda koalicionit qeverisës./Almakpress