Në Manastir u shënua sot 22 Nëntori, Dita e Alfabetit Shqiptar, një nga ngjarjet më të rëndësishme në historinë kulturore e kombëtare të shqiptarëve. Aktivitetet përkujtimore sollën në vëmendje vendimin historik të Kongresit të Manastirit, i cili më 1908 i dha gjuhës shqipe alfabetin e njësuar, duke hapur rrugën drejt arsimit dhe kulturës moderne shqiptare. Në mesazhin për Ditën e Alfabetit, u theksua se ky moment historik “i dha gjuhës sonë alfabetin e njësuar dhe kombit tonë mjetin më të fuqishëm të unitetit, kulturës dhe përparimit”, ndërsa u kujtua se alfabeti i përbashkët bëri të mundur lindjen e shkollës, librit dhe shtypit shqip. “Çdo shkronjë shqipe mbart sakrificën dhe shpirtin e një populli të pathyeshëm”, u theksua në mesazhin përkujtimor, duke nënvizuar rolin e gjuhës shqipe si themel i identitetit dhe qytetarisë shqiptare. 22 Nëntori mbetet simbol i unitetit kombëtar dhe i përpjekjeve të intelektualëve shqiptarë për të ndërtuar një gjuhë të standardizuar që bashkon shqiptarët kudo.