Një ditë pas ekstradimit nga Dubai drejt Shqipërisë, Durim Bami i është drejtuar Drejtoria e Përgjithshme e Burgjeve me një kërkesë zyrtare për të mos u mbajtur në Institucionin e Ekzekutimit të Vendimeve Penale “313” në Tiranë, por për t’u transferuar në burgun e Fushë Krujës.

Sipas një shkrese të hartuar nga avokati i tij, argumentohet se në ambientet e burgut 313 jeta e Bamit është në rrezik, pasi aty ndodhen persona që, sipas pretendimeve të mbrojtjes, kërkojnë eliminimin fizik të tij. Në dokument theksohet nevoja për masa të menjëhershme për garantimin e sigurisë personale dhe për shmangien e çdo situate që mund të cenojë integritetin e tij.

Kërkesa për transferim vjen në një moment delikat, menjëherë pas kthimit të tij në Shqipëri, ndërsa ndaj tij rëndojnë akuza të rënda nga Struktura e Posaçme Kundër Korrupsionit dhe Krimit të Organizuar. Sipas SPAK, Bami akuzohet për sigurimin e kushteve dhe mjeteve materiale për kryerjen e vrasjes, në formën e bashkëpunimit në kuadër të një grupi të strukturuar kriminal, si dhe për veprat penale grup i strukturuar kriminal dhe pjesëmarrje në grup të strukturuar kriminal.

Mbetet për t’u parë se cili do të jetë vendimi i autoriteteve penitenciare lidhur me kërkesën për transferim dhe nëse do të merren masa shtesë sigurie në funksion të garantimit të rendit dhe integritetit brenda sistemit të burgjeve.