Sonte, me propozim të kryetarit Izet Mexhiti, Lëvizja Demokratike mbajti një takim me strukturat partiake, ku pika e vetme e rendit të ditës ishte zyrtarizimi i VLEN si një forcë e bashkuar politike.

Duke manifestuar pjekuri të lartë politike dhe duke pranuar mesazhin e shumicës së shqiptarëve, njëzëri u autorizua z. Mexhiti që të vazhdojë të udhëheqë procesin e transformimit të partisë dhe shkrirjen e saj në VLEN si një strukturë të fuqishme dhe moderne politike.

“Jemi fuqishëm të bindur se po vazhdojmë të krijojmë një mundësi historike që VLEN të vazhdojë të konsolidohet dhe ta forcojë rolin e saj si përfaqësuesja kryesore e vullnetit të shumicës së shqiptarëve”, deklaruan nga Lëvizja Demokratike, duke theksuar se ky hap konsolidon skenën politike shqiptare dhe vendos baza të forta për pjesëmarrje dhe ndikim më të madh në jetën politike të ardhshme.

Zyrtarizimi i VLEN shënon një moment të rëndësishëm në zhvillimin e politikës shqiptare dhe synon të forcojë unitetin dhe prezencën e komunitetit shqiptar në vend.