NATO ka vendosur të pezullojë aktivitetet stërvitore të misionit të saj në Irak dhe të tërheqë rreth 600 anëtarë të personelit, në mes të tensioneve të rritura në Lindjen e Mesme që nga fundi i shkurtit.

Sipas raportimeve të Iraqi News, ky vendim lidhet me përshkallëzimin e situatës së sigurisë pas sulmeve të ndërmarra nga Shtetet e Bashkuara të Amerikës dhe Izraeli ndaj Irani, duke rritur rrezikun për personelin ushtarak të huaj në territorin irakian.

Burime zyrtare bëjnë të ditur se pezullimi i misionit është i përkohshëm. Ndërkohë, kryeministri i Irakut, Mohammed Shia al-Sudani, zhvilloi një bisedë me Sekretarin e Përgjithshëm të NATO-s, Mark Rutte, ku theksoi rëndësinë e shmangies së përshkallëzimit dhe forcimit të rrugës diplomatike.

Al-Sudani u bëri thirrje vendeve anëtare të NATO-s të shmangin përfshirjen aktive në konflikt, duke paralajmëruar për pasojat e mundshme të një përshkallëzimi të mëtejshëm në rajon.