Kryeministri i Kosovës, Albin Kurti, ka pritur në takim ambasadorin e Zvicrës në Kosovë, Jürg Sprecher, me të cilin ka diskutuar për avancimin e marrëdhënieve dypalëshe dhe thellimin e bashkëpunimit në mandatin e ri qeverisës.

Gjatë takimit, Kurti vlerësoi Zvicrën si një ndër partnerët më të rëndësishëm të Kosovës, duke theksuar se bashkëpunimi ndërtohet mbi vlera të përbashkëta si sundimi i ligjit dhe qeverisja demokratike. Ai shprehu gatishmërinë për forcimin e mëtejshëm të këtij bashkëpunimi, duke falënderuar për mbështetjen e vazhdueshme përmes KFOR dhe Agjencia Zvicerane për Zhvillim dhe Bashkëpunim.

“Zvicra është një nga partnerët më të çmuar të Kosovës”, u shpreh Kurti, duke theksuar rëndësinë e mbështetjes në zhvillimin institucional dhe ekonomik.

Në kuadër të programeve zhvillimore, Zvicra ka zotuar 86 milionë euro për Kosovën, ndërsa për periudhën 2026-2029 janë planifikuar edhe mbi 64 milionë euro shtesë.

Nga ana tjetër, ambasadori Sprecher uroi Kurtin për mandatin e ri dhe konfirmoi angazhimin e Zvicrës për bashkëpunim të ngushtë me institucionet e Kosovës. Në takim u diskutua edhe për rolin e mërgatës kosovare në Zvicër si urë lidhëse, si dhe për Marrëveshjen e Tregtisë së Lirë me EFTA, e cila ende pret ratifikimin në Kuvend.

Zvicra mbetet ndër investitorët kryesorë në Kosovë dhe një nga burimet më të mëdha të remitencave.