Shtëpia e Bardhë ka deklaruar se planet për bisedime me Iranin mbeten “fluide”, duke paralajmëruar se çdo spekulim nuk duhet të konsiderohet përfundimtar derisa të ketë njoftime zyrtare. Kjo vjen pas deklaratave kontradiktore mes presidentit amerikan Donald Trump dhe kryetarit të parlamentit iranian lidhur me mundësinë e negociatave për konfliktin në vazhdim.

Trump ka pohuar se ka shtyrë me pesë ditë sulmet ndaj centraleve energjetike iraniane pas bisedimeve “produktive” me Teheranin, ndërsa pala iraniane i ka cilësuar këto pretendime si “lajme të rreme”. Një zyrtar i lartë iranian i tha CBS News se Irani ka marrë disa propozime nga SHBA përmes ndërmjetësve dhe ato po shqyrtohen, por negociatat nuk janë ende të konfirmuara.

Shtëpia e Bardhë ka bërë thirrje për kujdes, duke theksuar se situata mbetet e paqëndrueshme dhe se nuk ka asnjë takim të konfirmuar mes përfaqësuesve të lartë të dy vendeve. Zëdhënësja Karoline Leavitt u shpreh se këto janë diskutime diplomatike të ndjeshme dhe SHBA nuk negocion përmes mediave.

Zhvillimet kanë ndikuar edhe në tregjet globale të energjisë. Çmimi i naftës Brent është rikthyer mbi 100 dollarë për fuçi duke arritur në rreth 103.69 dollarë në tregjet aziatike ndërsa nafta amerikane Nymex ka rritur gjithashtu çmimin. Rritja vjen pas shtyrjes së sulmeve dhe sinjaleve për një marrëveshje të mundshme paqeje por investitorët mbeten të pasigurt për zhvillimet e ardhshme.

Burimi: CBS News