Në një ceremoni zyrtare të zhvilluar këtë të mërkurë, presidentja e Kosovës, Vjosa Osmani, ka dekoruar Kombëtaren e Kosovës në futboll me Medaljen Presidenciale të Meritave, si vlerësim për sukseset dhe përfaqësimin dinjitoz në arenën ndërkombëtare.

Në aktivitet morën pjesë drejtues të rëndësishëm të futbollit kosovar dhe lojtarë të ekipit përfaqësues, ndërsa u vlerësua roli i tyre në rritjen e imazhit të vendit përmes sportit.

Presidentja Osmani theksoi se Kombëtarja ka qenë burim krenarie për qytetarët, duke sjellë emocione dhe duke dëshmuar përkushtim në çdo ndeshje, “Me nderin më të lartë të republikës së Kosovës, sot dekorojmë ekipin kombëtar në futboll, një ekip që me përkushtim, disiplinë dhe shpirt të jashtëzakonshëm ka përfaqësuar në mënyrën më të denjë shtetin tonë në arenën ndërkombëtare”.

Ajo shtoi se kjo dekoratë është një vlerësim për mundin dhe sakrificën e futbollistëve, “Republika e Kosovës e nderon punën dhe krenarinë që i keni dhënë çdo shqiptari, kudo që jeton”.

Në fund, Osmani ritheksoi besimin për të ardhmen e ekipit, duke nënvizuar se rrugëtimi drejt sukseseve të mëdha vazhdon, pavarësisht rezultateve të fundit.

Burimi: Telegrafi