Në vendkalimin kufitar Bogorodicë, autoritetet doganore të Maqedonisë së Veriut kanë zbuluar një rast të tentativës për kontrabandë me fruta dhe perime, duke sekuestruar gjithsej 12.5 ton mallra të padeklaruara.

Sipas Drejtorisë së Doganave, rasti është evidentuar gjatë kontrollit të një ngarkese në procedurë tranziti, ku janë konstatuar sasi të konsiderueshme produktesh që nuk figuronin në dokumentacionin përkatës doganor.

Në mesin e mallrave të konfiskuara janë mbi 3 ton avokado, rreth 2.5 ton speca djegës, 600 kilogramë brokoli, 2.3 ton luleshtrydhe, 3.3 ton kivi dhe 40 kilogramë kërpudha, me një vlerë të përgjithshme prej rreth 1.4 milionë denarësh.

Autoritetet bëjnë të ditur se mallrat janë konfiskuar, ndërsa ndaj personit të dyshuar është ngritur kallëzim penal për veprën penale kontrabandë. Rasti po trajtohet nga Departamenti i Hetimeve pranë Drejtorisë së Doganave.