Kryeministri i Kosovës, Albin Kurti, ka deklaruar se Ballkani Perëndimor nuk duhet të trajtohet si periferi e Evropës, por si pjesë e saj e pandarë historikisht, politikisht dhe kulturalisht.

Duke folur për një panel me temën “Ku përfundon Evropa – vizion dhe pragmatizëm në kohë trazirash gjeopolitike”, Kurti theksoi rëndësinë e unitetit dhe vendimmarrjes së guximshme nga vendet progresiste evropiane në një periudhë tensionesh globale.

Ai u shpreh se integrimi në Bashkimin Evropian është domosdoshmëri për forcimin e demokracisë, zhvillimit ekonomik dhe sigurisë afatgjatë në rajon, duke shtuar se vonesat në procesin e zgjerimit krijojnë hapësirë për ndikime të jashtme dhe rreziqe gjeopolitike.

“Në këtë kuptim, vizioni dhe pragmatizmi sot nënkuptojnë integrimin e shpejtë të Ballkanit Perëndimor si pjesë e projektit evropian”, u shpreh Kurti gjatë diskutimit.

Ai shtoi se Evropa duhet të forcojë unitetin e saj dhe të veprojë me përgjegjësi në mbrojtje të vlerave demokratike edhe përtej kufijve të saj, duke përmendur rajone si Ukraina, Moldavia dhe Gjeorgjia.