Agjencia për Parandalimin e Korrupsionit në Kosovë ka paralajmëruar masa ndëshkuese ndaj dhjetëra zyrtarëve publikë për mosdeklarim në kohë të pasurisë, përfshirë gjoba dhe kallëzime penale për rastet më të rënda.

Sipas drejtorit të institucionit, Yll Buleshkaj, gjithsej 35 zyrtarë nga institucione të ndryshme pritet të gjobiten, ndërsa ndaj pesë prej tyre do të dorëzohen kallëzime penale për mosrespektim të detyrimeve ligjore.

Në mesin e tyre figurojnë hetues, një komandant policie, zyrtarë doganorë, mjekë, profesorë dhe punonjës të institucioneve të tjera publike. Tre prej rasteve lidhen me mosdeklarim të plotë të pasurisë, ndërsa dy të tjera me deklarim jashtë afatit ligjor.

Agjencia për Parandalimin e Korrupsionit bën të ditur se nga mbi 10 mijë zyrtarë të obliguar për deklarim, shumica dërrmuese e kanë përmbushur këtë detyrim brenda afatit ligjor, i cili përfundon çdo vit më 31 mars.

Sipas ligjit në fuqi, mosdeklarimi i pasurisë mund të dënohet me gjobë deri në 500 euro, ndërsa Kodi Penal parasheh edhe dënime me burgim deri në tre vjet në rastet më të rënda.

Ekspertë të fushës së drejtësisë theksojnë se deklarimi i pasurisë mbetet një instrument kyç për luftën kundër korrupsionit, por sipas tyre zbatimi praktik dhe ndëshkimet mbeten ende të kufizuara.

Burimi: Radio Evropa e Lirë