Seanca e parë në themel ndaj ish-presidentit të Shqipërisë, Ilir Meta, është zhvilluar këtë të hënë në Gjykata e Posaçme kundër Korrupsionit dhe Krimit të Organizuar, ku ai është paraqitur në sallë nën masa sigurie.

Sipas raportimit të Top Channel, Meta është shfaqur në kafazin e xhamit, duke përshëndetur të pranishmit me gjest simbolik dhe duke deklaruar, “Shqipëria e shqiptarëve”.

Para nisjes së seancës, ai e cilësoi procesin si të padrejtë, duke u shprehur, “Ju ftoj të ndiqni dhe transmetoni live të gjithë procesin, mbaj përgjegjësi për çdo veprim timin”. Gjykata ka miratuar kërkesën e tij që seanca të zhvillohet publike.

Kjo është përballja e parë e drejtpërdrejtë e Metës në gjyq për dosjen ndaj tij, ndërsa procesi pritet të vijojë me shqyrtimin e provave dhe dëshmive.