Kryetari i Komunës së Tetovës, Bilall Kasami, gjatë qëndrimit të tij në Tiranë u takua me ish-kryeministrin shqiptar Sali Berisha. Kasami njoftoi se biseda u zhvillua rreth nevojës për përmirësimin e bashkëpunimit ndërshqiptar, çështjeve aktuale politike dhe të ardhmes së përbashkët në Bashkimin Evropian. "Biseduam rreth nevojës për përmirësimin e bashkëpunimit ndërshqiptar, për çështjet aktuale politike dhe për të ardhmen tonë të përbashkët në BE," shkroi Kasami. Kryetari i Tetovës e përgëzoi Berishën për rizgjedhjen në krye të Partisë Demokratike dhe i dëshiroi sukses në sfidat e ardhshme politike. Kasami theksoi se do ta vazhdojë komunikimin me synimin e "bashkëpunimit më të mirë politik mes faktorit shqiptar në rajon".