Bashkryetari i VLEN-it dhe kryetari i Komunës së Çairit, Izet Mexhiti, ka vlerësuar mbrëmjen kulturore “Sofra Shkupjane”, e cila u mbajt në Sheshin “Skënderbeu” në Shkup, në kuadër të aktiviteteve të Verës Kulturore të Shkupit. Sipas Mexhitit, sheshi u mbush me këngë shqipe, traditë shkupjane dhe një atmosferë të veçantë, ndërsa theksoi se “Sofra Shkupjane” i dha ngjyra të veçanta kësaj mbrëmjeje, duke sjellë në qytet tingujt e muzikës shqiptare dhe duke bashkuar qytetarët. “Shkupi sonte këndoi shqip, vallëzoi shqip dhe tregoi edhe një herë shpirtin e tij artistik, kulturën dhe traditën që e bëjnë kaq të veçantë”, u shpreh Mexhiti.