Kryetari i BDI-së, Ali Ahmeti, zhvilloi sot një takim me ushtruesen e detyrës së Ambasadores së Shteteve të Bashkuara të Amerikës në Maqedoninë e Veriut, Nicole Varnes, ku u diskutua për çështje me interes të përbashkët, me theks të veçantë te sundimi i ligjit, marrëdhëniet ndëretnike, si dhe zhvillimet që lidhen me paqen dhe stabilitetin global. Ahmeti bëri të ditur se gjatë takimit u zhvillua një bisedë e hapur dhe konstruktive, ndërsa shprehu mirënjohjen për mbështetjen e vazhdueshme të SHBA-së ndaj vlerave demokratike, integrimit euroatlantik dhe perspektivës së vendit. "Jam i bindur se partneriteti ynë do të vazhdojë të forcohet në funksion të paqes, stabilitetit dhe një të ardhmeje më të mirë për të gjithë qytetarët", u shpreh Ahmeti.