Ambasadori i Shqipërisë në Maqedoninë e Veriut, Denion Meidani, mori pjesë në shënimin e 30-vjetorit të themelimit të Komunës së Haraçinës dhe 25-vjetorit të Betejës së Lavdishme të Haraçinës, duke vlerësuar sakrificën dhe kontributin e banorëve të kësaj treve në momentet më të rëndësishme të historisë kombëtare. Në fjalën e tij, Meidani theksoi se Haraçina mbetet simbol i qëndresës, dinjitetit dhe njerëzve që iu përgjigjën thirrjes së historisë, ndërsa nderoi dëshmorët, veteranët dhe familjet e tyre. "Ka momente në historinë e një kombi kur koha ndalet dhe historia shtron vetëm një pyetje, Ku ishe ti kur kombi kishte nevojë për ty?", u shpreh ambasadori. Ai theksoi se përgjegjësia e brezit të sotëm është të nderojë sakrificën e të rënëve përmes ndërtimit të institucioneve më të forta, mbrojtjes së gjuhës, identitetit, dinjitetit dhe barazisë, duke punuar për një të ardhme evropiane për brezat që do të vijnë.