Bashkëkryetari i VLEN, Izet Mexhiti, ka deklaruar se dy vitet e fundit kanë dëshmuar se ndryshimi është i mundur, duke theksuar se për herë të parë shqiptarët kanë përfituar pjesën që u takon përmes investimeve të konsiderueshme në komunat me shumicë shqiptare.

Sipas tij, rreth 3 miliardë euro investime janë orientuar në këto komuna, ndërsa premtime që për vite me radhë kanë mbetur vetëm në fushata zgjedhore janë shndërruar në vendime konkrete, ligje, investime dhe projekte të realizuara.

“Dy vjet ishin të mjaftueshme për të rrëzuar bindjen se asgjë nuk ndryshon. Për herë të parë, shqiptarët morën hisen që u takon, me rreth 3 miliardë euro investime në komunat me shumicë shqiptare. Ajo që për vite u përdor si premtim elektoral, ne e kthyem në vendime, ligje, investime dhe projekte që shihen e preken”, u shpreh Mexhiti.

Ai shtoi se dallimi mes qeverisjes së kaluar dhe asaj aktuale është i dukshëm, duke theksuar se është kaluar “nga politika e privilegjeve te politika e meritës, nga propaganda te rezultatet, nga shteti që u shërbente të paktëve te shteti që u shërben qytetarëve”, duke përfunduar se ky është një ndryshim që, sipas tij, nuk mund të mohohet.