E ngarkuara me punë në Ambasadën e SHBA-së në Kosovë, Anu Prattipati, deklaroi se partneriteti mes dy vendeve ka potencial të madh për t'u zgjeruar, duke theksuar se mundësitë për bashkëpunim në mbrojtje, tregti, investime dhe energji janë "të pakufishme". Ajo shtoi se "bizneset amerikane po kërkojnë partnerë të besueshëm, fuqi punëtore dhe tregje konkurruese. Kosova ka mundësi që të jetë të tri këto gjëra". Në aktivitetin e organizuar me rastin e 250-vjetorit të shtetësisë amerikane, Prattipati u shpreh se SHBA-ja synon ta forcojë edhe më tej partneritetin me Kosovën, duke theksuar se "një Kosovë stabile dhe prosperuese nuk është e mirë vetëm për qytetarët e saj, por edhe për Evropën dhe botën". Ajo nënvizoi se SHBA-ja do të vazhdojë të mbështesë Kosovën në ndërtimin e institucioneve të forta dhe një ekonomie që tërheq investime dhe krijon mundësi për të gjithë qytetarët.