Ministrja e Kulturës dhe Turizmit e Kosovës, Saranda Bogujevci, qëndroi për vizitë në Preshevë, ku u prit nga kryetarja e komunës, Ardita Sinani. Gjatë takimit u theksua vazhdimësia e bashkëpunimit ndërinstitucional ndërmjet Qeverisë së Kosovës dhe Komunës së Preshevës, me fokus mbështetjen e kulturës, artit dhe ruajtjen e identitetit kombëtar. Dy zyrtaret vizituan edhe edicionin e dytë të Panairit të Librit "Libri dhe Tradita", i cili po mbahet në Preshevë dhe po konsiderohet si një nga ngjarjet më të rëndësishme kulturore për qytetin dhe rajonin. Kryetarja Sinani vlerësoi mbështetjen dhe gatishmërinë e ministres Bogujevci për thellimin e bashkëpunimit në projekte që kontribuojnë në zhvillimin e kulturës, promovimin e vlerave kombëtare dhe forcimin e lidhjeve ndërmjet institucioneve. Ajo theksoi se bashkëpunimi do të vazhdojë me përkushtim dhe vizion të përbashkët, në shërbim të qytetarëve dhe kulturës shqiptare.