Policia e Tetovës ka arrestuar tre persona gjatë kontrolleve të realizuara në komunikacion, pasi u konstatuan shkelje të rënda të Ligjit për Sigurinë në Trafik. Sipas policisë, një 21-vjeçar nga Larca u ndalua në Grupçin duke drejtuar automjet pa patentë shoferi, ndërsa në rrugën “Iliria” u arrestua një 22-vjeçar nga Poroji, i cili drejtonte motoçikletë pa patentë. Në një rast tjetër, në orët e para të mëngjesit në Tetovë u arrestua një 22-vjeçar nga Gostivari, i cili drejtonte automjet edhe pse ndaj tij ishte në fuqi masë aktive e ndalimit për drejtimin e mjeteve motorike. Të tre personat janë ndaluar në stacion policor, ndërsa automjetet janë sekuestruar përkohësisht. Pas dokumentimit të rasteve, ndaj tyre do të parashtrohen kallëzimet përkatëse penale.