Zëvendëskryeministri i parë i Maqedonisë së Veriut, Bekim Sali, së bashku me liderë evropianë, vizitoi Katedralen e Fjetjes së Hyjlindëses (Dormition/Uspensky Cathedral) në Kiev, një prej simboleve më të rëndësishme të trashëgimisë shpirtërore, kulturore dhe historike të Ukrainës. Sali theksoi se ky vend i shenjtë, i rindërtuar pas shkatërrimeve të luftës, është dëshmi e forcës, qëndrueshmërisë dhe shpresës së popullit ukrainas. Ai nënvizoi se ruajtja e trashëgimisë kulturore nuk ka vetëm vlerë historike, por përbën edhe mbrojtje të identitetit dhe të vlerave që i bashkojnë vendet evropiane. Sipas Bekim Salit, vizita në këtë monument të rëndësishëm përcjell mesazhin se trashëgimia kulturore duhet të mbrohet dhe të ruhet si pjesë e identitetit të përbashkët evropian.