Kryeministri i Shqipërisë, Edi Rama, ka reaguar pas debatit të krijuar për mungesën e një reagimi të menjëhershëm ndaj deklaratës së ministres serbe Snezhana Paunoviq, e cila përmendi "spastrimin etnik" të Kosovës. Në një postim në platformën X, Rama theksoi se qëndrimi zyrtar i Shqipërisë është shprehur përmes Ministrisë për Evropën dhe Punët e Jashtme. "Ne kemi reaguar përmes ministrit të Jashtëm, siç bën një shtet me respekt për veten", shkroi Rama, duke shtuar se Shqipëria nuk duhet të shndërrohet në "një kor histerik" sa herë që zyrtarë serbë bëjnë deklarata të ngjashme. Me këtë reagim, kreu i qeverisë shqiptare nënvizoi se institucionet shtetërore duhet të flasin përmes kanaleve zyrtare dhe jo të përgjigjen me deklarata të përsëritura për çdo zhvillim politik.