Gjykata Themelore në Prishtinë e ka shpallur fajtor ish-kryetarin e Prishtinës, Shpend Ahmeti, duke e dënuar me dy vite burgim dhe 5 mijë euro gjobë, për mosraportim të pasurisë. Sipas aktgjykimit, dënimi me burgim do të ekzekutohet pas plotfuqishmërisë së vendimit, ndërsa gjoba duhet të paguhet brenda tre muajve nga plotfuqishmëria e aktgjykimit. Rasti lidhet me mosdeklarimin e mjeteve financiare në vlerë totale prej 172 mijë e 600 eurosh. Sipas aktakuzës së Prokurorisë, bëhet fjalë për 118 mijë e 200 euro të depozituara në llogarinë personale të Ahmetit dhe 54 mijë e 400 euro të pranuara në llogaritë e nënës së tij. Gjatë procesit gjyqësor, Ahmeti ishte deklaruar i pafajshëm dhe kishte thënë se paratë për të cilat akuzohej se nuk i kishte deklaruar ishin ndihmë familjare. “Në asnjë mënyrë nuk ka qenë qëllim fshehja e këtyre mjeteve”, kishte deklaruar ai në gjykatë. Aktgjykimi është shpallur më 24 korrik 2026 nga Gjykata Themelore në Prishtinë.