Një grup dypartiak ligjvënësish amerikanë po kërkon që sesioni vjetor i Asamblesë Parlamentare të OSBE-së në vitin 2027 të mbahet në Çarlston të Karolinës së Jugut, në vend të Beogradit. Nisma, e udhëhequr nga republikani Joe Wilson dhe e mbështetur nga 40 bashkënënshkrues, sipas Reuters, ka hapur një debat në Uashington mbi marrëdhëniet me Serbinë dhe rolin e SHBA-së në institucionet shumëpalëshe. Wilson argumenton se një takim i zhvilluar në SHBA do të dërgonte një sinjal të qartë për përkushtimin amerikan ndaj aleatëve të saj në OSBE. Ai ka kritikuar gjithashtu qëndrimin e Beogradit ndaj Kosovës, ndërsa disa ligjvënës amerikanë kanë shprehur shqetësime për lidhjet ekonomike të Serbisë me Rusinë dhe faktin që ajo nuk është rreshtuar me sanksionet perëndimore kundër Moskës. Në anën tjetër, ligjvënës të tjerë në Uashington mbështesin vazhdimin e angazhimit me qeverinë serbe, me synimin që Beogradi të afrohet më shumë me Perëndimin dhe të përparojë drejt Bashkimit Evropian. Mes mbështetësve të rezolutës së Wilsonit është edhe demokrati William Keating, i cili deklaroi se sesioni duhet të zhvillohet në SHBA, “për të theksuar rolin e rëndësishëm që Shtetet e Bashkuara duhet të luajnë në institucionet shumëpalëshe”. Megjithatë, vendimi përfundimtar për organizimin e sesionit të vitit 2027 ende nuk është konfirmuar. Dokumentet zyrtare të Asamblesë Parlamentare të OSBE-së tregojnë se, deri në shkurt 2026, nikoqiri i sesionit të vitit 2027 nuk ishte përcaktuar ende. Burimi: Reuters