Në Çarshinë e Vjetër të Shkupit është zbuluar një pllakë përkujtimore në nderim të urbanistit polak Adolf Ciborowski, si shenjë mirënjohjeje për rolin e tij në procesin e rindërtimit dhe planifikimit urban të qytetit pas tërmetit të vitit 1963. Ciborowski, i cili ishte i përfshirë në procesin ndërkombëtar të rindërtimit të Shkupit, kontribuoi në hartimin e vizionit urban të qytetit pas katastrofës. Burime historike e lidhin atë edhe me përpjekjet për ruajtjen e Çarshisë së Vjetër, në një periudhë kur Shkupi po përballej me sfidën e ndërthurjes së zhvillimit modern me trashëgiminë historike. Me vendosjen e pllakës përkujtimore, organizatorët vlerësuan kontributin e Ciborowskit dhe rëndësinë e ruajtjes së Çarshisë së Vjetër si pjesë e identitetit historik, kulturor dhe urban të Shkupit.