Prokuroria Themelore Publike në Gjevgjeli ka nisur procedurë hetimore ndaj një shtetasi serb, i dyshuar për shmangie të pagesës së akcizës, pasi në pikën kufitare Bogorodicë u zbuluan 5.000 steka cigare pa pulla akcize të fshehura në një kamion me targa serbe. Sipas Prokurorisë, i dyshuari kishte deklaruar se po transportonte material izolues në procedurë tranziti, por gjatë kontrollit doganor, mbi mallin e deklaruar, u gjetën 100 kuti kartoni me steka cigaresh pa pulla akcize. Vlera e akcizës që dyshohet se është tentuar të shmanget arrin në afro 5 milionë denarë. “Gjatë kontrollit, mbi mallin e deklaruar, zyrtarët doganorë kanë zbuluar 100 kuti kartoni, në të cilat ishin paketuar stekat e cigareve pa pulla akcize”, njoftoi Prokuroria Publike. Për shkak të dyshimeve se i dyshuari mund të arratiset, të ndikojë në dëshmitarë ose të pengojë zhvillimin e procedurës penale, prokurori publik i ka propozuar Gjykatës Themelore në Gjevgjeli caktimin e masës së paraburgimit.