Kryeministri në detyrë i Kosovës, Albin Kurti, ka përkujtuar 25-vjetorin e rënies së Gjeneral Tahir Sinanit, duke e cilësuar atë si një ndër luftëtarët më të shquar të çështjes kombëtare shqiptare dhe një oficer me kontribut të veçantë në luftërat çlirimtare. Kurti theksoi se data 29 korrik ka një simbolikë të veçantë, pasi përkon me rënien e Tahir Sinanit në vitin 2001 gjatë angazhimit të tij në radhët e Ushtrisë Çlirimtare Kombëtare, por edhe me vendimet e Konferencës së Ambasadorëve në Londër më 29 korrik 1913, të cilat, sipas tij, shënuan një nga momentet më të rëndësishme në historinë politike të shqiptarëve. Ai kujtoi se Tahir Sinani iu bashkua Ushtrisë Çlirimtare të Kosovës në vitin 1998, duke sjellë jo vetëm përvojën e tij ushtarake, por edhe duke trajnuar qindra luftëtarë. Sipas Kurtit, Sinani refuzoi të merrte një pozitë komanduese mbi ushtarët që kishte stërvitur, duke zgjedhur që fillimisht të përballej vetë në vijën e parë të frontit. "Lavdi jetës dhe veprës së Gjeneral Tahir Sinanit, si dhe të gjithë luftëtarëve të lirisë!", u shpreh Kurti në mesazhin e tij përkujtimor.