Ylli shqiptar me famë botërore, Dua Lipa, është rikthyer në Prishtinë për edicionin e shtatë të Sunny Hill Festival, duke ndarë me ndjekësit emocionet e saj për nisjen e festivalit. Përmes një postimi në rrjetet sociale, këngëtarja tregoi se ka vizituar mbrëmjen e kaluar hapësirën ku do të zhvillohet festivali dhe se është impresionuar nga përgatitjet e bëra nga organizatorët. “JEMI SËRISH KËTU!!!! Nuk mund ta besoj që jemi gati të nisim edicionin e 7-të të Sunny Hill Festival!!!!!!”, shkroi Dua Lipa, duke shprehur entuziazmin për rikthimin e festivalit. Ajo tha se ndihet “jashtëzakonisht krenare për familjen tonë dhe gjithë ekipin, për gjithçka që është bërë për ta realizuar këtë”, ndërsa shtoi se është “absolutisht e emocionuar dhe plot energji” për nisjen e eventit. Në të njëjtin postim, Dua Lipa ndau edhe një moment të veçantë nga dita e saj, duke zbuluar se është bërë “nënëzë” e një fëmije. “Dhe për ta bërë ditën e djeshme edhe më magjike... u bëra nënëzë”, shkroi ajo. Në fund, këngëtarja iu drejtua fansave me një mesazh emocionues: “Mund të them me siguri se lotët nuk kanë të ndalur gjithë ditën... SHIHEMI SONTE, PRISHTINË!!!!!”