Presidenti i Shteteve të Bashkuara, Donald Trump, ka autorizuar një fushatë të re sulmesh ushtarake ndaj Iranit, e cila sipas raportimit të Wall Street Journal mund të nisë gjatë këtij fundjave. Sipas medias amerikane, vendimi është marrë në një moment kur përplasjet mes Uashingtonit dhe Teheranit po thellohen dhe përpjekjet diplomatike kanë hyrë në një fazë të vështirë.

Nga ana tjetër, autoritetet iraniane kanë paralajmëruar se çdo sulm i ri do të marrë përgjigje, duke kërcënuar me kundërveprime ndaj objektivave amerikane dhe izraelite. Retorika e ashpër nga të dyja palët ka shtuar shqetësimet për një përshkallëzim të mëtejshëm të konfliktit në rajon.

Situata mbetet e tensionuar edhe në Ngushticën e Hormuzit, një prej rrugëve detare më të rëndësishme për transportin e naftës në botë. Sipas raportimeve, një tanker nafte është goditur nga një predhë e paidentifikuar, ndërsa nuk janë raportuar viktima. Incidenti ka rikthyer shqetësimet për sigurinë e lundrimit dhe ndikimin që përshkallëzimi i konfliktit mund të ketë në tregjet globale të energjisë.