Përvjetori i Ilindenit u shënua me mesazhe politike nga kryeministri Hristijan Mickoski dhe kryetari i LSDM-së, Venko Filipçe, nga Pelinca dhe Krusheva. Mickoski tha se Ilindeni nuk është vetëm një datë, por “një amanet dhe karakter”, duke theksuar se beteja e kësaj gjenerate është për ta rikthyer idealin e atdheut për të cilin, sipas tij, ëndërronin ilindenistët dhe asnomistët. “Beteja e kësaj gjenerate është shpresa e fundit për të ardhmen e atdheut. Dhe nuk guxojmë dhe nuk mund të dështojmë”, deklaroi Mickoski, i cili kritikoi edhe opozitën, duke e akuzuar se ofron pesimizëm dhe ndarje në vend të ideve, ndërsa bëri thirrje për bashkim. Nga Krusheva, Filipçe tha se beteja e sotme është për “një jetë me dinjitet, drejtësi, sundim të ligjit dhe një të ardhme evropiane”. “Ne luftojmë për një Maqedoni ku sundon ligji, e jo interesi partiak”, tha ai, duke shtuar se respekti për Ilindenin duhet të dëshmohet përmes ndërtimit të një shteti të lirë, demokratik dhe prosperues.