Deputeti ukrainas Oleksiy Goncharenko ka kritikuar deklaratën e presidentit Volodymyr Zelensky në Beograd, ku ai rikonfirmoi se Ukraina nuk do ta ndryshojë qëndrimin e saj ndaj Kosovës. Goncharenko, iniciues i projektligjit për njohjen e Kosovës në Parlamentin e Ukrainës, e cilësoi këtë qëndrim si një “gabim diplomatik”. Në një reagim në rrjetin social “X”, ai publikoi deklaratën e Zelenskyt së bashku me një fotografi ku shihet se slogani “Free Ukraine”, i vendosur në “Grand Hotel” në Prishtinë, ishte larguar. “Ky është një gabim diplomatik. Ukrainasit mbështesin pavarësinë e Kosovës dhe ne besojmë se Ukraina DUHET ta njohë shtetin”, shkroi Goncharenko. Ai shtoi se do të vazhdojë angazhimin e tij për këtë çështje, duke theksuar: “Unë do të vazhdoj të luftoj për pavarësinë e Kosovës dhe përfundimisht Ukraina do ta njohë atë.” Deklarata e tij vjen në një kohë kur qëndrimi i Ukrainës ndaj Kosovës është rikthyer në qendër të debatit pas vizitës së Zelenskyt në Beograd.