Problemi me sigurimin shëndetësor të punonjësve të Ministrisë së Punëve të Brendshme është tejkaluar, ndërsa ata tashmë mund t’i përdorin pa pengesa shërbimet dhe të drejtat që u takojnë nga sigurimi shëndetësor. Gjatë ditës, Ministria e Punëve të Brendshme dhe Fondi për Sigurim Shëndetësor kanë qenë në koordinim të vazhdueshëm, në bashkëpunim edhe me Drejtorinë e të Ardhurave Publike, për të përcaktuar shkaqet që kishin sjellë ndërprerjen e përkohshme të realizimit të të drejtave shëndetësore. Pas masave të ndërmarra, gjendja është normalizuar dhe punonjësve të MPB-së u është mundësuar përdorimi i papenguar i shërbimeve shëndetësore. Dy institucionet kanë bërë të ditur se do të vazhdojnë bashkëpunimin për gjetjen e një zgjidhjeje sistemore, me synimin që sigurimi shëndetësor të funksionojë në mënyrë të pandërprerë dhe të drejtat e punonjësve të realizohen në kohë edhe në të ardhmen.