Bujar Osmani, së bashku me kryetarin e ardhshëm të Bërvenicës siç e quajti ai, Arkin Jahiji, dhe kryetarin e Gostivarit, Valbon Limani, ka vizituar sot fshatrat Radiovcë dhe Tenovë, ku është takuar me banorët dhe ka diskutuar për nevojat e tyre dhe të ardhmen e komunës.

Gjatë takimeve, bisedat u përqendruan te shqetësimet e qytetarëve dhe rëndësia politike që ka Bërvenica në këtë moment. Osmani vlerësoi se kjo komunë përfaqëson më shumë se një garë lokale, duke e cilësuar si një moment të rëndësishëm për shprehjen e vullnetit qytetar.

“Bërvenica sot është shumë më tepër se një garë lokale. Është një pikë kthese, ku qytetarët kanë mundësinë të tregojnë se vullneti i tyre nuk mund të zëvendësohet nga projektet e inxhinierisë politike”, theksoi Osmani.

Ai falënderoi banorët e Radiovcës dhe Tenovës për mikpritjen dhe bisedat e sinqerta, duke nënvizuar rëndësinë e komunikimit të drejtpërdrejtë me qytetarët.