Kryetari i LSDM-së opozitare, Venko Filipçe, ka bërë të ditur se gjatë kësaj jave do të zhvillojë një takim me Arben Taravarin, liderin e Aleancës për Shqiptarët, i cili së fundmi ka njoftuar largimin e partisë së tij nga koalicioni qeveritar dhe kalimin në opozitë.

Takimi, i cili ishte parashikuar për javën e kaluar, është shtyrë për ditët në vijim.

“E shtymë takimin me Arben Taravarin për këtë javë, kështu që do të takohem me të këto ditë,” deklaroi Filipçe në një konferencë për shtyp, duke iu përgjigjur pyetjeve të gazetarëve mbi zhvillimet e fundit politike.

Ai komentoi edhe situatën brenda qeverisë, duke theksuar se koalicioni aktual është në prag të shpërbërjes, vetëm një vit pas formimit të tij.

“Taravari ishte një faktor kyç në bllokun shqiptar që iu bashkua kësaj qeverie. Do të shohim se si do të shkojnë gjërat sa i përket koalicionit, lëvizjes së partisë Aleanca për Shqiptarët,” shtoi Filipçe.

Lëvizja e fundit e Aleancës për Shqiptarët drejt opozitës shihet si një zhvillim i rëndësishëm në skenën politike të vendit, që pritet të ndikojë në balancat e pushtetit dhe dinamikën e bashkëpunimeve ndërpartiake në periudhën në vijim./Almakpress