Një zhvillim i rëndësishëm në fushën e bashkëpunimit ndërkombëtar policor është shënuar sot, pasi nga Dubai është ekstraduar në Maqedonia e Veriut 33-vjeçari Florim Limani, njoftojnë nga Ministria e Punëve të Brendshme e Maqedonisë së Veriut, përcjell TV21.

Sipas MPB-së, Limani kërkohej me fletarrest ndërkombëtar për vuajtjen e një dënimi me burg prej tre vjetësh e gjashtë muajsh për veprën penale “prodhim, posedim dhe tregtim i paautorizuar i armëve ose lëndëve shpërthyese”, sipas nenit 396 paragrafi 1 të Kodit Penal.

Autoritetet bëjnë të ditur se ky është ekstradimi i parë që realizohet nga Emiratet e Bashkuara Arabe drejt vendit tonë, pas një kërkese me fletarrest ndërkombëtar, duke e cilësuar rastin si një hap të rëndësishëm në forcimin e bashkëpunimit juridik dhe policor ndërkombëtar.