Ministri i Punëve të Jashtme dhe Diasporës i Kosovës, Glauk Konjufca, tha se një kandidat për president nga familja e heroit kombëtar, Adem Jashari, do të përbënte një “konsensus automatik” në shoqëri, duke theksuar se deri tani, të vetmit emra që kanë shkaktuar pritje pozitive dhe konsensus janë nga kjo familje e nderuar.

I pyetur nëse ekziston vullnet nga familja Jashari për kandidim, Konjufca u shpreh se nuk është i autorizuar të flasë në emër të tyre dhe sugjeroi që përgjigjen duhet ta marrin drejtpërdrejt nga familja, duke shtuar se kryeministri Albin Kurti ka vizituar së fundmi Prekazin dhe ka biseduar me Rifat Jashari për çështje politike.

Emrat e familjes Jashari janë përmendur më parë si kandidatë potencialë për president, por asnjëri nuk ka qenë propozim zyrtar deri tani.