Presidenti i Shqipërisë, Bajram Begaj, gjatë qëndrimit të tij zyrtar në Shkup, theksoi se faktori shqiptar ka qenë dhe mbetet vendimtar për stabilitetin politik dhe avancimin euroatlantik të Republika e Maqedonisë së Veriut.

Në deklaratën e tij, Begaj vuri në pah se roli i shqiptarëve në shtetndërtimin dhe konsolidimin institucional të vendit është i pazëvendësueshëm, duke e cilësuar këtë kontribut si themelor për ruajtjen e balancave politike dhe për forcimin e orientimit strategjik drejt Bashkimit Evropian dhe NATO-s.

Ai theksoi se përdorimi i gjuhës shqipe dhe përfaqësimi i drejtë dhe adekuat i shqiptarëve në institucionet shtetërore nuk janë thjesht çështje teknike apo administrative, por elemente thelbësore për kohezionin social, për stabilitetin institucional dhe për perspektivën evropiane të vendit.

Sipas presidentit shqiptar, respektimi i të drejtave të komuniteteve dhe zbatimi konsekuent i standardeve demokratike janë garanci për një shoqëri funksionale dhe për një të ardhme të sigurt euroatlantike të Maqedonisë së Veriut.