Kuvendi Qendror i Alternativës ka vendosur që partia të bashkohet në subjektin e ri politik VLEN, duke hapur rrugën për një fazë të re të organizimit politik. Në këtë drejtim, është marrë edhe vendimi që, deri në përfundimin e procesit të unifikimit, të pushojnë të gjitha organet aktuale të partisë.

Po ashtu, Kuvendi Qendror ka sugjeruar që para nënshkrimit të marrëveshjes përfundimtare të detajohen qartë të drejtat dhe detyrimet e secilit organ në strukturën e ardhshme të VLEN-it, me qëllim funksionimin e qëndrueshëm të subjektit të ri politik.

Në të njëjtën kohë, kryetari i Alternativës, Bekim Sali, është autorizuar të vazhdojë negociatat për unifikimin, duke marrë mandat të plotë për vendimmarrje në këtë proces.