Momenti aktual gjeopolitik konsiderohet si një mundësi e rrallë për zgjerimin e Bashkimit Evropian, por kjo dritare mund të mos zgjasë për shumë kohë. Kështu vlerëson ambasadori francez në Shkup, Christophe Le Rigollier, i cili në një intervistë për Radio Evropa e Lirë thekson se vendi duhet të veprojë me shpejtësi për të avancuar procesin integrues.

Sipas tij, hapi vendimtar për hapjen e kapitujve të parë negociues, të njohur si “Vlerat Themelore”, mbetet miratimi i ndryshimeve kushtetuese, në përputhje me kornizën negociuese të vitit 2022. Ai nënvizon se ky proces është i pashmangshëm dhe përbën kushtin kryesor për të rikthyer dinamikën e integrimit evropian.

Duke folur për raportet me Bullgaria, diplomati francez thekson se dialogu mes dy vendeve nuk duhet të përdoret për të rihapur kompromisin evropian, por vetëm për të rindërtuar besimin e ndërsjellë.

Rigollier vlerëson se qeveria aktuale ka kapacitetet për të realizuar këto ndryshime, duke pasur parasysh shumicën parlamentare, dhe shton se miratimi i tyre do të nxiste një fazë të re zhvillimi në marrëdhëniet me Bashkimin Evropian.

“Besojmë se ndryshimet kushtetuese do të zbatohen lehtësisht, duke krijuar një dinamikë të re në rrugën e vendit drejt BE-së, sepse aktualisht procesi është i bllokuar dhe duhet të rifillojë”, deklaron ai.