Presidenti amerikan Donald Trump deklaroi se Shtetet e Bashkuara janë afër përfundimit të të gjitha objektivave ushtarake në Iran dhe se misioni mund të përfundojë brenda dy deri tre javësh. Në një mesazh drejtuar kombit, ai shtoi se SHBA-të janë plotësisht të pavarura nga Lindja e Mesme dhe prania amerikane ka për qëllim vetëm mbështetjen e aleatëve: “Ne jemi atje për të ndihmuar aleatët tanë, nuk kemi nevojë për asgjë që kanë ata.”

Trump kritikoi aleatët lidhur me Ngushticën e Hormuzit duke thënë se Shtetet e Bashkuara nuk importojnë naftë prej andej dhe pas përfundimit të luftës ngushtica do të rihapet natyrshëm. Ai vlerësoi efektivitetin e operacionit më 28 shkurt kundër Iranit, duke deklaruar se regjimi dhe programi bërthamor u zhdukën brenda 32 ditësh: “Jemi në prag të përfundimit të kërcënimit të Iranit ndaj Amerikës.”

Presidenti theksoi se ndryshimi i regjimit nuk ishte objektiv, por eliminimi i udhëheqësve historikë solli një lidership më të arsyeshëm dhe paralajmëroi se SHBA-të do të godasin objektet energjetike të Iranit nëse nuk arrihet marrëveshje. Ai u shpreh gjithashtu optimist për ekonominë amerikane: “Ekonomia jonë është jashtëzakonisht e fortë, inflacioni nuk ekziston dhe tregjet do të rimëkëmben pas përfundimit të luftës.”