Unionet e studentëve nga universitetet shqiptare në vend kanë paralajmëruar protestë më 6 prill në Shkup, duke kërkuar zgjidhje për atë që e cilësojnë si padrejtësi të vazhdueshme ndaj studentëve të drejtësisë.

Protesta do të nisë nga Ura e Gurit në orën 12:30, ndërsa organizatorët u bëjnë thirrje mediave dhe shoqërisë civile për mbështetje dhe sensibilizim.

“Zëri juaj ka qenë thelbësor në ngritjen e kësaj çështjeje dhe në informimin e drejtë të opinionit publik. Sot, më shumë se kurrë, kjo mbështetje na duhet edhe më tej”, thuhet në reagimin e studentëve.

Ata theksojnë se problemi kryesor mbetet pamundësia për të dhënë provimin e jurisprudencës në gjuhën shqipe, pavarësisht se kjo, sipas tyre, është e drejtë e garantuar me Kushtetutë dhe ligj.

Thirrja është nënshkruar nga unionet e Universiteti i Tetovës, Universiteti Nënë Tereza dhe Universiteti i Evropës Juglindore, të cilët kërkojnë që çështja të marrë zgjidhje konkrete.