Aleanca për Shqiptarët, krahu i Arben Taravarit, ka reaguar ndaj deklaratave të fundit të kryetarit të Komunës së Tetovës, Bilall Kasami, lidhur me rrugën Tetovë–Prizren, duke i cilësuar ato si të pasakta dhe në kundërshtim me realitetin.

Në reagimin publik thuhet se pretendimi se projekti “ka filluar” nuk qëndron, pasi sipas të dhënave zyrtare nga Ministria e Transportit, projekti është ende në fazë fillestare dhe po përgatitet dokumentacioni, ndërsa nuk ka procedurë tenderimi dhe as nisje të punimeve.

Nga kjo parti theksojnë se paraqitja e ndërhyrjeve lokale si projekt ndërkufitar përbën manipulim, duke ngritur shqetësimin për, siç thuhet, krijimin e një realiteti të rremë për qytetarët. Sipas tyre, ekziston një kontradiktë e qartë mes qeverisë që flet për projektim dhe komunës që pretendon ndërtim.

“Pse qytetarëve po u thuhet e kundërta? Kjo nuk është gabim. Është krijim i një realiteti të rremë”, thuhet në reagim, duke shtuar se “kur faktet janë të qarta, përfundimi është i vetëm, qytetarëve po u shitet propagandë si realitet”.