Gjykata Kushtetuese pritet të shqyrtojë sot çështjen që lidhet me ministren e parë të emëruar me Inteligjencë Artificiale, “Diella”. Trupi gjykues do të mblidhet në orën 17:30, ndërsa pas seancës pritet të japë vendimin lidhur me kushtetutshmërinë e emërimit të saj.

Çështja është dërguar në Gjykatën Kushtetuese pas ankimimit të një të pestës së deputetëve të Partisë Demokratike, të cilët pretendojnë se Presidenti i Republikës ka vepruar në kundërshtim me Kushtetutën duke dekretuar një ministër që, sipas tyre, nuk i plotëson kushtet e kërkuara për ushtrimin e këtij funksioni.

Deputetët demokratë kërkojnë shfuqizimin e nenit 2 të Dekretit nr. 331, datë 12.09.2025, “Për emërimin e Kryeministrit”, si dhe shfuqizimin e nenit 1, pika 1, fjalia e dytë, të Dekretit nr. 333, datë 15.09.2025, “Për emërimin e Këshillit të Ministrave”, duke i konsideruar ato të papajtueshme me Kushtetutën e Republikës së Shqipërisë.

Vendimi i Gjykatës Kushtetuese pritet me interes të lartë, pasi mund të krijojë një precedent të rëndësishëm për përdorimin e Inteligjencës Artificiale në institucionet shtetërore.

Burimi: Top Channel