Temperaturat ekstreme po shndërrohen në një nga kërcënimet më serioze për shëndetin publik në Europë, ku sipas të dhënave të Organizatës Botërore të Shëndetësisë mbi 200 mijë persona kanë humbur jetën nga shkaqe të lidhura me të nxehtin gjatë katër viteve të fundit. Drejtori Rajonal i OBSH-së për Europën, Hans Henri P. Kluge, e cilësoi nxehtësinë ekstreme si "një nga pasojat më të menjëhershme dhe më vdekjeprurëse të ndryshimeve klimatike", duke theksuar se "valët e të nxehtit nuk janë më fenomene të izoluara, por po kthehen në një krizë të përsëritur që ushtron presion të madh mbi sistemet shëndetësore, infrastrukturën dhe shërbimet publike." OBSH u ka bërë thirrje qeverive evropiane të hartojnë plane të posaçme veprimi, duke përfshirë krijimin e qendrave të freskimit, shtimin e hapësirave të gjelbra dhe mbrojtjen e grupeve më të rrezikuara. Organizata thekson se Europa po ngrohet më shpejt se shumë rajone të tjera të botës dhe se kombinimet e plakjes së popullsisë, urbanizimit dhe rritjes së temperaturave po shtojnë ndjeshëm rrezikun, ndërsa "masat parandaluese mund të shpëtojnë mijëra jetë çdo vit."

Burimi: Euronews