Policia ka ndërmarrë një aksion të intensifikuar në komunikacion në rajonet e Kumanovës dhe Tetovës, ku gjatë kontrolleve janë shqiptuar gjithsej 114 sanksione për shkelje të rregullave të trafikut. Operacioni është zhvilluar më 13 qershor, në intervalin kohor nga ora 17:00 deri në 23:00, me fokus tek drejtuesit e motoçikletave, mopedëve, katërçikleve dhe trotinetëve elektrikë. Sipas Ministrisë së Punëve të Brendshme, në Kumanovë janë evidentuar 43 shkelje, ndërsa në Tetovë 71. Pjesa më e madhe e masave janë shqiptuar për drejtim motoçiklete pa helmetë mbrojtëse, krahas kundërvajtjeve të tjera që lidhen me dokumentacionin dhe rregullat e komunikacionit.

Gjatë aksionit janë zbuluar gjithsej shtatë raste që përfshijnë vepra penale, janë arrestuar shtatë persona për veprën penale “drejtim i pakujdesshëm i automjetit motorik”, ndërsa policia ka sekuestruar gjashtë motoçikleta dhe një veturë. Nga MPB bëjnë të ditur se kontrollet e intensifikuara do të vazhdojnë edhe në ditët në vijim, duke u bërë thirrje të gjithë pjesëmarrësve në komunikacion që të respektojnë rregullat për të rritur sigurinë në rrugë.

Burimi: Alsat.mk