Nënsekretari i Përgjithshëm i OKB-së për Operacionet e Paqes, Jean-Pierre Lacroix, gjatë vizitës së tij në Kosovë, zhvilloi takime me kryeministrin në detyrë, Albin Kurti, dhe ministrin në detyrë të Punëve të Jashtme dhe Diasporës, Glauk Konjufca, ku në fokus ishte progresi i Kosovës dhe rëndësia e vazhdimit të dialogut.

Sipas njoftimit të UNMIK-ut, gjatë takimeve u vlerësuan përpjekjet e vazhdueshme të Kosovës dhe arritjet e deritanishme, ndërsa u theksua nevoja për bashkëpunim të mëtejshëm. "Lacroix riafirmoi mbështetjen për Dialogun e lehtësuar nga BE-ja dhe theksoi angazhimin e vazhdueshëm të UNMIK-ut për forcimin e sundimit të ligjit, promovimin e të drejtave të njeriut dhe mbështetjen e ndërtimit të besimit ndërmjet komuniteteve", thuhet në njoftim.

Gjatë vizitës, zyrtari i lartë i OKB-së zhvilloi gjithashtu takime me përfaqësues të komunitetit diplomatik dhe organizatave ndërkombëtare.