Kryeministri i Maqedonisë së Veriut, Hristijan Mickoski, deklaroi se vendi po përballet me një fushatë të organizuar nga Bullgaria, e cila, sipas tij, synon të promovojë qëndrime të papranueshme përmes disa figurave politike në vend. Në një intervistë për MRT, ai tha se "pasionet e ulëta dhe fushata e organizuar janë të dukshme", duke shtuar se beson shumë pak te rastësitë në politikë. Duke folur për raportet me Bullgarinë, Mickoski akuzoi Sofjen se nuk po i përmbush obligimet ndërkombëtare, duke mos zbatuar vendimet e Gjykatës Evropiane për të Drejtat e Njeriut lidhur me të drejtat e komunitetit maqedonas në Bullgari. Sipas tij, "politika zhivkoviste që mohon identitetin maqedonas vazhdon edhe sot". Kryeministri theksoi gjithashtu se Bullgaria nuk heq dorë nga Protokollet 1 dhe 2 dhe se Shkupi nuk do të ndërmarrë ndryshime kushtetuese pa garanci për përfundimin e procesit drejt Bashkimit Evropian. "Nuk kemi ndërmend ta fillojmë këtë garë, kemi ndërmend ta përfundojmë", u shpreh Mickoski, duke shtuar se qeveria do të veprojë "me mençuri, taktikë dhe strategji" për të korrigjuar gabimet e së kaluarës.