Kryeministri i Moldavisë, Alexandru Munteanu, ka dhënë dorëheqje, një vendim që sjell automatikisht edhe dorëheqjen e qeverisë dhe hap një fazë të re politike në vend. Në deklaratën e tij, Munteanu tha se vendimi erdhi pasi nuk mund ta ushtronte më detyrën në përputhje me bindjet dhe parimet e tij. “Sot, mandati im si kryeministër mbaron. Në momentin që kuptova se nuk mund ta kryeja më mandatin tim në përputhje me parimet dhe bindjet e mia, zgjodha të jap dorëheqjen”, deklaroi ai, duke shtuar se do të vazhdojë t'i shërbejë Moldavisë nga çdo pozicion që do të mbajë në të ardhmen. Dorëheqja paraqet një sfidë për presidenten Maia Sandu dhe Partinë e Veprimit dhe Solidaritetit (PAS), e cila qeveris vendin. Sipas procedurave kushtetuese, presidentja do të zhvillojë konsultime me partitë parlamentare për të propozuar një kandidat të ri për kryeministër. Munteanu kishte marrë detyrën në nëntor të vitit 2025, pas fitores së PAS në zgjedhjet parlamentare dhe kishte një përvojë të gjatë pune në institucione ndërkombëtare, përfshirë edhe Bankën Botërore.